咧欲過年矣,家家戶戶,尤其是厝內兮長輩序大,佇即个時節上要緊兮代誌著是去街仔抑是路邊兮擔仔買菜,通好佇二九暝食爐兮時陣攢幾若項腥臊豐沛兮手路菜,專工欲予踮外口拍拚,久久仔才轉來故鄉蜀擺兮囝兒序細閣會用得食著怹上佮意兮故鄉滋味。
阮阿兄,文才,現此時當佇咧外省拍拚,聽講是佇當地兮蜀个病院做研究兮,閣做甲袂䆀兮款,職位敢若真懸,下底袂少跤手攏愛聽伊兮。有即種遐爾仔有出脫兮兄哥,毋但我,阮規口灶兮儂攏感覺非常驕傲。閣過無幾工著隨欲過年矣,即馬兮我真正足向望會使緊看著阿兄,足濟問題想欲共問。
「阿敏,汝阿兄敢有共汝講伊當時會轉來?」阿母按呢共我問。順紲講蜀下,阿敏是我兮偏名,厝內兮儂攏按呢叫,我全名號做淑敏。
「無呢,伊講伊即馬當咧無閒,猶未確定啥物時陣會使轉來。」
「是喔,規冬無看著矣,嘛是誠數念伊。」
我感覺會著阿母講兮話內底流出兮凊心感,隨共應講
「阿兄一定會轉來兮啦,無較停仔我閣敲手機仔予伊,叫伊予咱蜀个較明確兮日子好無?」
「毋免啦,無定著伊當咧無閒,按呢共攪擾著敢好?」
佇阿母講了頭前彼句進前,我早著共阿兄兮手機仔號碼揤好勢,準備欲敲矣。
手機仔開始鈃矣,鈃無三聲,手機仔彼頭隨走出誠吵兮聲。
「阿敏是毋?敢有啥物代誌?」
「啊,無啦,著是前幾工毋是有問汝啥物時陣會使轉來,彼當陣毋是講猶無啥確定?結果阿母敢若欲吼矣呢。」
「汝蜀个查某(tsőo)囡仔咧講啥,」阿母那感覺見笑,那欲按我遮共手機仔搶過去「覅烏白講話。」紲落來看家己搶無,著規氣大聲喝講「阿才,覅聽阿敏凊彩講話,我才無欲吼咧。」
「啊,是我講毋著,干焦(ta̋nn)欲哭爾爾。」
「謼,汝真正是……」
「哈哈,聽恁咧答喙鼓有影足趣味。」阿兄聽著阮兮聲音,感覺真愛笑,來聲音雄雄抑低,「即站仔頂懸兮講會使予阮先轉去過年,凡勢二九暝前兩三工著會用得到厝矣。」
「遐好?閣會使先歇假喔?是講是按怎阿兄汝講話雄雄變細聲?」
敢若予儂(hőng)揬著要害仝款「敢是按呢?無啦,應該是傷過歡喜兮款。」阿兄兮聲隨成做佮平常時蜀點仔差別也無兮聲。
「盍有儂歡喜兮時陣聲音降低兮啦,汝頭殼是去硞著呢(nih)?」我真愛笑个共剾洗。
「好啦,覅閣講這矣,我誠期待轉去佮我古錐可愛兮小妹見面呢。」
「閣來矣,好啦,我嘛足數念汝兮,我緣投兮阿才兄。先按呢,眉眉(BAIBĀI)。」
「嗯,眉眉(BAIBĀI)。」
雖罔彼當陣感覺阿兄共聲抑低蜀件代誌怪怪,毋閣過無偌久我著無囥佇心內矣。