我讀材料兮,想講嘛是愛寫蜀寡佮材料相關兮物件分享予逐家
---------------------------------------------------------------------------
「揀白鐵仔著愛揀三空四兮」
相信袂少儂攏聽過即句話,是按怎白鐵仔愛揀三空四兮?佇了解因端進前,咱來先了解白鐵仔。
用吸石著會當分辨鋼鐵到底是烏鐵仔抑是白鐵仔?
定著有濟濟儂捌看過序大儂挈蜀粒吸石去吸鐵仔,看伊會吸,隨佮汝掛保証講這鐵仔毋是白鐵仔。雖罔即个袂用得講完全毋著,是一般儂判斷白鐵烏鐵上緊兮方式,猶毋過其實毋是所有兮白鐵仔攏無磁性,咱著愛看伊是佗蜀款白鐵仔。
白鐵仔兮分類
米國材料佮試驗協會(American Society for Testing and Materials, ASTM)針對白鐵仔有規定各種分類。簡單分,會當分做2起頭,3起頭,4起頭三款(排除較複雜兮,像雙相佮坐底型),基本上即寡白鐵仔兮號碼攏以三碼構成,佮逐家捷聽著兮304仝款。2XX代表Cr-Ni-Mn奧司特耐(Austenite)型兮白鐵仔,3XX代表Cr-Ni奧司特耐型兮白鐵仔,4XX代表肥粒(Ferrite)型佮馬田史(Martensite)型兮白鐵仔。其中4XX著是頭前所講兮,會去予吸石吸起來兮白鐵仔。若講是按怎2XX佮3XX無磁性,4XX兮煞有,這著牽涉著鋼鐵本身兮內部結構。簡單講,奧司特耐兮結晶結構面心立方(FCC)會當消除磁矩,肥粒佮馬田史兮結晶結構體心立方(BCC)無法度。
啥物是白鐵仔?
一般來講,白鐵仔是Cr含量至少愛超過11%兮鋼鐵。白鐵仔會當防止生鉎著是因為內底有夠額兮Cr。白鐵仔內底兮Cr會佮鐵仔外口兮酸素相敆,佇鐵仔表面產生蜀層保護膜,一般稱呼做鈍化膜,即層膜非常密,會當阻擋外口兮酸素繼續侵入鐵仔內底佮鐵元素結合造成鐵仔生鉎,這著是白鐵仔防止生鉎兮祕密武器。
若按呢,即寡無仝兮白鐵仔到底差佇佗位,是按怎攏講愛揀三空四兮咧?
4XX兮白鐵仔,通常碳含量較懸,而且內底濫兮Cr嘛拄仔好迒過低限爾。碳傷濟著有佮Cr結合兮風險,造成鐵仔表面兮Cr含量降低,致使鈍化膜失去保護兮作用,外口等待機會兮酸素著會佇即个時陣侵入鐵仔內底,佮鐵元素相敆,產生烏烏紅紅兮各種酸化鐵,著生鉎矣。
2XX兮問題是Mn。奧司特耐型兮白鐵仔抗蝕能力通常較懸,猶毋過奧司特耐是高溫才會出現兮結構,佇常溫袂出現,愛靠佇鐵仔內底摻Ni即種元素才會用得予奧司特耐佇常溫中出現。但是Ni是蜀種較罕有兮元素,誠貴,所以蜀寡儂會共Ni換做Mn元素,Mn嘛仝款有才調予奧司特耐佇常溫出現,而且閣俗,煞成做蜀種新兮牌號。毋過,Mn會對人體兮中樞神經造成危害,所以食品級兮用具袂使用2XX兮白鐵仔。
304兮Cr佮Ni含量是18%佮8%,所以嘛予儂號做18-8白鐵仔。伊上大兮好處著是較袂生鉎,而且嘛袂對儂兮健康造成傷大兮威脅,嘛因為按呢才會成做白鐵仔界兮名牌。