文件 #087-III：探索III
Bûn-kiānn #087-III: Thàm-soh III
D-9884是一个平均體型佮外範的23歲女子。心理背景表示伊有鬱症的過往。目標人員有一寡仔用過份的暴力來[資料拊去]的紀錄。D-9884配備有電池會用擋24點鐘的75瓦照海燈、一台串流傳輸手提錄影機、猶有佮控制中心的██████博士聯絡的耳機組。D-9884嘛配備有一个跤綁，內底裝3.75公升的白滾水、15枝營養食食條佮1領電熱毯仔。
D-9884 sī tsi̍t ê pîng-kin thé-hîng kah guā-pān--ê 23 huè lú-tsú. Sim-lí puē-kíng piáu-sī i ū ut-tsìng--ê kuè-óng. Bo̍k-piau-jîn-uân ū tsi̍t-kuá-á iōng kuè-hūn--ê pō-li̍k lâi [TSU-LIĀU HÚ-KHÌ]--ê kì-lo̍k. D-9884 phuè-pī ū tiān-tî ē-īng tòng 24 tiám-tsing--ê 75 uá tsiò-hái-ting, tsi̍t tâi tshuàn-liû thuân-su tshiú-the̍h lo̍k-iánn-ki, iá-ū kah Khòng-tsè-tiong-sim--ê ██████ phok-sū liân-lo̍k--ê hīnn-ki-tsoo. D-9884 mā phuè-pī ū tsi̍t ê kha-páng, lāi-té tsng 3.75 kong-tsin--ê pe̍h-kún-tsuí, 15 ki îng-ióng-tsia̍h-si̍t-tiâu kah 1 tiâu tiān-jia̍t-thán-á.
D-9884徛佇SCP-087地面層平台的塗跤。照海燈干焦共頭先9階照光爾。無看著頂擺探索期間囥佇壁頂的LED電火。
D-9884 khiā tī SCP-087 tē-bīn tsàn pîng-tâi--ê thôo-kha. Tsiò-hái-ting kan-na kā thâu-sing 9 kai tsiò kng niā. Bô khuànn-tio̍h tíng-pái thàm-soh kî-kan khǹg tī piah tíng--ê LED tiān-hué.
██████博士：請對第一層落低而且檢查中央平台的壁。
██████ phok-sū: Tshiánn uì tē-it tsàn lo̍h-kē jî-tshiánn kiám-tsa tiong-iong-pîng-tâi--ê piah.
D-9884落低13層停佇中央平台。佇探索-II影片紀錄顯示LED電火所囥的位無電火的形影。
D-9884 lo̍h-kē 13 tsàn thîng tī tiong-iong-pîng-tâi. Tī Thàm-soh-II iánn-phìnn kì-lo̍k hián-sī LED tiān-hué sóo khǹg--ê uī bô tiān-hué--ê hîng-iánn.
D-9884：是、呃、只是一堵垃圾的紅毛塗壁。看起來無物件。無，等咧。遮有小可仔黏黏。
D-9884: Sī, eh, tsí-sī tsi̍t tóo lah-sap--ê âng-mn̂g-thôo -piah. Khuànn--khí-lâi bô mi̍h-kiānn. Bô, tán--leh. Tsia ū sió-khuá-á liâm-liâm.
D-9884比出壁頂遐LED電火應該然愛佇的所在。
D-9884 pí--tshut piah tíng hia LED tiān-hué ìng-kai-jiân ài tī--ê sóo-tsāi.
D-9884：下底有一个囡仔咧哭！伊咧[頓蹬]伊咧哀求救人閣咧哭。
D-9884: Ē-té ū tsi̍t ê gín-á teh khàu! I teh [tùn-tenn] i teh ai-kiû kiù-lâng koh teh khàu.
██████博士：多謝。請繼續行落樓梯到你注意著任何反形的物件為止。
██████ phok-sū: To-siā. Tshiánn kè-sio̍k kiânn lo̍h lâu-thui kàu lí tsù-ì-tio̍h līm-hô huán-hîng--ê mi̍h-kiānn uî-tsí.
D-9884落低。佇伊到位後一个中央平台的時，有收著佮進前兩擺探索一致的囡仔哭聲。任何一堵中央平台的壁敢若攏無出現LED電火。D-9884繼續行到第17个中央平台進前無事件發生。
D-9884 lo̍h-kē. Tī i kàu-uīāu tsi̍t ê tiong-iong-pîng-tâi--ê sî, ū siu-tio̍h kah tsìn-tsîng nn̄g pái thàm-soh it-tì--ê gín-á khàu siann. Līm-hô tsi̍t tóo tiong-iong-pîng-tâi--ê piah ká-ná lóng bô tshut-hiān LED tiān-hué. D-9884 kè-sio̍k kiânn kàu tē 17 ê tiong-iong-pîng-tâi tsìn-tsîng bô sū-kiānn huat-sing.
D-9884：俺娘喂，遮塗跤有啥物物件鼻起來有夠䆀的。規个黏黏而且牢佇我的鞋仔頂懸。乎，足癩(疒哥)。
D-9884: Án-niâ-ueh, tsia thôo-kha ū siánn-mih mi̍h-kiānn phīnn--khí-lâi ū-kàu bái--ê. Kui-ê liâm-liâm jî-tshiánn tiâu tī guá--ê ê-á tíng-kuân.Honnh, tsiok thái-ko.
錄影確定彼个物質占了直徑成50公分的空間。
Lo̍k-iánn khak-tīng hit ê bu̍t-tsit tsiàm liáu ti̍t-kìng siânn 50 kong-hun--ê khong-kan.
██████博士：你敢會當描寫彼个味？
██████ phok-sū: Lí kám ē-tàng biâu-siá hit ê bī?
D-9884：啊……伊鼻起來淡薄仔像舊的生鉎金屬佮尿。
D-9884: Ah… i phīnn--khí-lâi tām-po̍h-á tshiūnn kū--ê senn-sian kim-sio̍k kah jiō.
██████博士：多謝。請繼續行到你注意著任何別个物件為止。
██████ phok-sū: To-siā. Tshiánn kè-sio̍k kiânn kàu lí tsù-ì-tio̍h līm-hô pa̍t-ê mi̍h-kiānn uî-tsí.
D-9884繼續行到第51个中央平台進前無發生事件。第51个中央平台佮頂擺旅途看著的維持無變，而且做的觀察嘛類似。閣一擺，要求D-9884落低到發現著任何反形的物件為止。目標人員繼續落低到第89層停落來。錄影設備雄雄幌一下而且目標人員喝出聲。
D-9884 kè-sio̍k kiânn kàu tē 51 ê tiong-iong-pîng-tâi tsìn-tsîng bô huat-sing sū-kiānn. Tē 51 ê tiong-iong-pîng-tâi kah tíng-pái lú-tôo khuànn-tio̍h--ê uî-tshî bô piàn, jî-tshiánn tsò--ê kuan-tshat mā luī-sū. Koh tsi̍t pái, iau-kiû D-9884 lo̍h-kē kàu huat-hiān-tio̍h līm-hô huán-hîng--ê mi̍h-kiānn uî-tsí. Bo̍k-piau-jîn-uân kè-sio̍k lo̍h-kē kàu tē 89 tsàn thîng--lo̍h-lâi. Lo̍k-iánn siat-pī hiông-hiông hàinn tsi̍t-ē jî-tshiánn bo̍k-piau-jîn-uân huah tshut siann.
D-9884：啊，姦！塗跤有一个空我差一點仔摔落。
D-9884: Ah, kàn! Thôo-kha ū tsi̍t ê khang guá tsha tsi̍t-tiám-á siak lo̍h.
錄影設備確定了有出現一个直徑成1公尺的空。目標人員共照海燈照射落，只有反映出烏暗。過了成4秒鐘，塌空下底遠近不明的所在有火光閃爍成2秒鐘，然後徙走去。
Lo̍k-iánn siat-pī khak-tīng liáu ū tshut-hiān tsi̍t ê ti̍t-kìng siânn 1 kong-tshioh--ê khang. Bo̍k-piau-jîn-uân kā tsiò-hái-ting tsiò-siā lo̍h, tsí-ū huán-ìng--tshut oo-àm. Kuè liáu siânn 4 bió-tsing, thap-khang ē-té hn̄g-kīn put-bîng--ê sóo-tsāi ū hué-kng siám-sih siânn 2 bió-tsing, jiân-āu suá tsáu--khì.
D-9884：下跤遐有光！這馬無去矣，但是伊有光差不多一秒！你敢有看著？
D-9884: Ē-kha hia ū kng! Tsit-má bô--khì--ah,tān-sī i ū kng tsha-put-to tsi̍t bió! Lí kám ū khuànn-tio̍h?
██████博士：有。你敢會當掠算一下這个空有偌深？
██████ phok-sū: Ū. Lí kám ē-tàng lia̍h-sǹg tsi̍t-ē tsit ê khang ū guā tshim?
D-9884：無可能。傷深啊。上少一公里。就像講，超過一公里足濟。
D-9884: Bô-khó-lîng. Siunn tshim--ah. Siōng tsió tsi̍t kong-lí. Tō tshiūnn kóng, tshiau-kuè tsi̍t kong-lí tsiok tsē.
██████博士：多謝。你敢閣會當聽著囡仔的聲？
██████ phok-sū: To-siā. Lí kám koh ē-tàng thiann-tio̍h gín-á--ê siann?
D-9884：呃嘿。伊聽起來猶原足遠。我感覺我完全無咧倚近伊。就敢若是我行一步，伊嘛行一步落。
D-9884: Eh heh. I thiann--khí-lâi iu-guân tsiok hn̄g. Guá kám-kak guá uân-tsuân bô teh uá-kīn i. Tō ká-ná sī guá kiânn tsi̍t pōo, i mā kiânn tsi̍t pōo lo̍h.
██████博士：請繼續行落到你拄著任何反形的物件為止。
██████ phok-sū: Tshiánn kè-sio̍k kiânn lo̍h kàu lí tú-tio̍h līm-hô huán-hîng--ê mi̍h-kiānn uî-tsí.
D-9884繼續落低SCP-087成一點鐘，加行過164層。伊停佇第253个中央平台歇睏，啉食1枝營養食食條佮幾若喙白滾水。掠算D-9884佇起頭中央平台下底1.1公里，毋過囡仔聲的音量猶無變化。暫停4分鐘了後，D-9884伊重新繼續落低，行另外216層無停，過了1.5點鐘。D-9884佇第469个中央平台，佇地面層的成1.8公里下底。
D-9884 kè-sio̍k lo̍h-kē SCP-087 siânn tsi̍t tiám-tsing, ke kiânn kuè 164 tsàn. I thîng tī tē 253 ê tiong-iong-pîng-tâi hioh-khùn, lim-tsia̍h 1 ki îng-ióng-tsia̍h-si̍t-tiâu kah kuí-nā tshuì pe̍h-kún-tsuí. Lia̍h-sǹg D-9884 tī khí-thâu tiong-iong-pîng-tâi ē-té 1.1 kong-lí, m̄-koh gín-á siann--ê im-liōng iá-bô piàn-huà. Tsiām-thîng 4 hun-tsing liáu-āu, D-9884 i tiông-sin kè-sio̍k lo̍h-kē, kiânn līng-guā 216 bô thîng, kuè liáu 1.5 tiám-tsing. D-9884 tī tē-bīn tsàn--ê siânn 1.8 kong-lí ē-té.
D-9884：我行袂到盡尾。我認為講已經到我欲轉去的時間矣。我的意思是，行落是一回事，但是欲(足百)轉去是遠溜溜。
D-9884: Guá kiânn buē kàu tsīn-bué. Guá līn-uî kóng í-king kàu guá beh tńg--khì--ê sî-kan--ah. Guá--ê ì-sù sī, kiânn lo̍h sī tsi̍t huê sū, tān-sī beh peh tńg--khì sī hn̄g-liu-liu.
██████博士：阮有供給你食食、白滾水佮毯仔會當擋24點鐘。請繼續行落。
██████ phok-sū: Gún ū kiong-kip lí tsia̍h-si̍t, pe̍h-kún-tsuí kah thán-á ē-tàng tòng 24 tiám-tsing. Tshiánn kè-sio̍k kiânn lo̍h.
D-9884：無愛，我想講我欲轉去頂懸啊。
D-9884: Bô ài, guá siūnn-kóng guá beh tńg--khì tíng-kuân--ah.
D-9884斡過身向樓梯的頭先彼層。
D-9884 uat kuè sin hiòng lâu-thui--ê thâu-sing hit tsàn.
D-9884：我──[吱叫聲]
D-9884: Guá - [ki-kiò siann]
SCP-087-1，彼个面，就佇D-9884的後壁，閘牢伊(足百)懸的路。彼个面出現佇錄影機鏡頭成30公分的所在；伊的目睭直接固定咧相鏡頭，這擺伊毋是咧看目標人員，顛倒是咧看鏡頭後壁看錄影的人。錄影設備小可仔故障而且畫面凍牢4秒，猶有錄音設備傳來像靜電的鑿耳噪音。然後切到D-9884咧緊捷落低樓梯漉漉幌的畫面。
SCP-087-1, hit ê bīn, tō tī D-9884--ê āu-piah, tsa̍h tiâu i peh kuân--ê lōo. Hit ê bīn tshut-hiān tī lo̍k-iánn-ki kiànn-thâu siânn 30 kong-hun--ê sóo-tsāi; i--ê ba̍k-tsiu ti̍t-tsiap kòo-tīng teh siòng kiànn-thâu, tsit pái i m̄ sī teh khuànn bo̍k-piau-jîn-uân, tian-tò sī teh khuànn kiànn-thâu āu-piah khuànn lo̍k-iánn--ê lâng. Lo̍k-iánn-siat-pī sió-khuá-á kòo-tsiong jî-tshiánn uē-bīn tàng tiâu 4 bió, iá ū lo̍k-im siat-pī thuân-lâi tshiūnn tsīng-tiān--ê tsha̍k-hī tshò-im. Jiân-āu tshiat kàu D-9884 teh kín-tsia̍p lo̍h-kē lâu-thui lok-lok-hàinn--ê uē-bīn.
D-9884：[驚惶起狂]伊一直綴佇我後壁！自頭到尾伊就一直佇我後壁喔天公伯仔伊就佇我後壁伊就咧共我看！██████博士拜託你鬥相共拜託救我喔天公伯仔無愛拜託共伊趕走拜託無愛拜託我知影伊綴佇我後壁救人叫伊離開拜託無愛伊咧共我看伊咧共我繩伊知影我佇遮自頭到尾伊一直咧共我看喔天公伯仔拜託救我無愛拜託[類似的形式繼續到結束為止。]
D-9884: [kiann-hiânn khí-kông] I it-ti̍t tuè tī guá āu-piah! Tsū-thâu-kàu-bué i tō it-ti̍t tī guá āu-piah ooh thinn-kong-peh--á i tō tī guá āu-piah i tō teh kā guá khuànn! ██████ phok-sū pài-thok lí tàu-sann-kāng pài-thok kiù guá ooh thinn-kong-peh--á bô ài pài-thok kā i kuánn tsáu pài-thok bô ài pài-thok guá tsai-iánn i tuè tī guá āu-piah kiù-lâng kiò i lī-khui pài-thokbô ài i teh kā guá khuànn i teh kā guá tsîn i tsai-iánn guá tī tsia tsū-thâu-kàu-bué i it-ti̍t teh kā guá khuànn ooh thinn-kong-peh--á pài-thok kiù guá bô ài pài-thok [Luī-sū--ê hîng-sik kè-sio̍k kàu kiat-sok uî-tsí.]
D-9884繼續佇緊捷落樓梯的時起狂吱吱叫佮哀求。進前聽著像靜電的噪音影影崁掉其他錄音，毋過猶是會當聽著原底的囡仔吼聲。落低成14層了後，錄影設備(扌甩)過直接翕著D-9884後壁彼區。彼个面這馬離錄影機鏡頭成20公分。伊無咧繩目標人員；顛倒是咧相錄影機鏡頭，予人一種伊的目睭咧金金相彼个咧看錄影的人的幻覺。有紀錄一項重要的代誌是，自影著SCP-087-1開始，彼个查某囝的吼聲佮懇求聲音量增加矣，表示D-9884咧倚近伊的根頭。佇驚惶中落低成150層、期間有3擺看著SCP-087-1確定伊閣咧逐了後，D-9884經著跋倒而且看起來眩倒去。錄音表明伊非常接近吼聲的根頭。有繼續聽著靜電聲佮鑿耳噪音。錄影顯示伊閣落低一層樓梯，表明D-9884猶未到樓梯井的底。12秒鐘無聲說，然後彼个面佔著錄影機的規个畫面，用目睭直直金金相看影片的人。
D-9884 kè-sio̍k tī kín-tsia̍p lo̍h lâu-thui--ê sî khí-kông ki-ki-kiò kah ai-kiû. Tsìn-tsîng thiann-tio̍h tshiūnn tsīng-tiān--ê tshò-im iánn-iánn khàm tiāu kî-thann lo̍k-im, m̄-koh iá-sī ē-tàng thiann-tio̍h guân-té--ê gín-á háu siann. Lo̍h-kē siânn 14 tsàn liáu-āu, lo̍k-iánn siat-pī hiù kuè ti̍t-tsiap hip-tio̍h D-9884 āu-piah hit khu. Hit ê bīn tsit-má lī lo̍k-iánn-ki kiànn-thâu siânn 20 kong-hun. I bô teh tsîn bo̍k-piau-jîn-uân; tian-tò sī teh siòng lo̍k-iánn-ki kiànn-thâu hōo lâng tsi̍t tsióng i--ê ba̍k-tsiu teh kim-kim-siòng hit ê teh khuànn lo̍k-iánn--ê lâng--ê huàn-kak. Ū kì-lo̍k tsi̍t hāng tiōng-iàu--ê tāi-tsì sī, tsū iánn-tio̍h SCP-087-1 khai-sí, hit ê tsa-bóo-kiánn--ê háu siann kah khún-kiû siann im-liōng tsing-ka--ah, piáu-sī D-9884 teh uá-kīn i--ê kin-thâu. Tī kiann-hiânn tiong lo̍h-kē siânn 150 tsàn, kî-kan ū 3 pái khuànn-tio̍h SCP-087-1 khak-tīng i koh teh jiok liáu-āu, D-9884 kenn-tio̍h pua̍h-tó jî-tshiánn khuànn--khí-lâi hîn-tó--khì. Lo̍k-im piáu-bîng i hui-siông tsiap-kīn háu siann--ê kin-thâu. Ū kè-sio̍k thiann-tio̍h tsīng-tiān siann kah tsha̍k-hī tshò-im. Lo̍k-iánn hián-sī i koh lo̍h-kē tsi̍t tsàn lâu-thui, piáu-bîng D-9884 iá-buē kàu lâu-thui-tsénn--ê té. 12 bió-tsing bô siann-seh, liân-āu hit ê bīn tsiàm-tio̍h lo̍k-iánn-ki--ê kui-ê uē-bīn, iōng ba̍k-tsiu ti̍t-ti̍t kim-kim-siòng khuànn iánn-phìnn--ê lâng.
錄音佮錄影斷線，而且無重新建立連結。
Lo̍k-im kah lo̍k-iánn tn̄g-suànn, jî-tshiánn bô tiông-sin kiàn-li̍p liân-kiat.
創作內容
文件#087-III Bûn-kiānn #087-III(台羅/教育部推薦漢字)
SCP台灣分部腦洞 (6)