SCP-001-EX-J CKG集倚會記錄 CKG Tsi̍p-uá-huē kì-lo̍k (台羅文版/教育部推薦漢字版)

作者：Hiok│2019-01-04 02:41:33│巴幣：2│人氣：215

文件SCP-001-EX-J包括抄錄的舊物件-I-U文件，對芙蓮士的███████磅空內底回收。因為這个文件的內容已經過流，使伊會使解祕。原底的文件收佇發現的所在，磅空內有關聯的部份因為無穩定的關係無對旅客開放。原底文件圖已經共翕相記錄起來。
Bûn-kiānn SCP-001-EX-J pau-kuat tshau-lo̍k--ê kū Mi̍h-kiānn-I-U bûn-kiānn, uì Hû-lián-sū--ê ███████ Pōng-khang lāi-té huê-siu. In-uī tsit ê bûn-kiānn--ê luē-iông í-king kuè-lâu, sú i ē-sái kái-pì. Guân-té--ê bûn-kiānn siu tī huat-hiān--ê sóo-tsāi, pōng-khang lāi ū kuan-liân--ê pōo-hūn in-uī bô ún-tīng--ê kuan-hē bô tuì lú-kheh khai-hòng. Guân-té bûn-kiānn tôo í-king kā hip-siōng kì-lo̍k--khí-lâi.
隨後發現著閣較濟佮一个知影叫做CKG(Catch掠起來、Keep收起來、Guard共保護)集倚會的組織文件，而且這馬當咧翻譯。
Suî-āu huat-hiān--tio̍h koh khah tsē kah tsi̍t ê tsai-iánn kiò-tsò CKG (Catch Lia̍h--khí-lâi, Keep Siu--khí-lâi, Guard Kā pó-hōo) Tsi̍p-uá-huē--ê tsoo-tsit bûn-kiānn, jî-tshiánn tsit-má tng-leh huan-i̍k.

啥物件：~~物件-I~~ 物件-I-U

Siánn mi̍h-kiānn: ~~Mi̍h-kiānn-I~~ Mi̍h-kiānn-I-U

物件外歹：~~袂足歹~~ 了解啊

Mi̍h-kiānn guā pháinn: ~~Buē Tsiok Pháinn~~ Liáu-Kái--ah

物件怎收：~~上少一定囥一隻物件-I佇磅空-III的塗跤的窟仔。~~佇囥物件-I的窟仔附近一定上少有一个精神的童醫。一定擲柴、葉仔佮骨頭予物件-I食，無伊會死。無佇塗跤的窟仔內底時，物件-I比山獅歹，有影歹。槍、斧抑是拳頭袂傷著物件-I。欲共阻擋用水、尿、擲塗跤抑是挈樹枝共拍。只有穿狼皮抑是閣較高級的童醫會當挈物件試物件-I，試進前愛共童醫U██講。

除非足短，無不准對物件-I放尿。──赦門A██

Mi̍h-kiānn tsuánn siu: ~~Siōng tsió it-tīng khǹg tsi̍t tsiah Mi̍h-kiānn-I tī pōng-khang-III--ê thôo-kha--ê khut-á.~~ Tī khǹg Mi̍h-kiānn-I--ê khut-á hù-kīn it-tīng siōng tsió ū tsi̍t ê tsing-sîn--ê Tâng-i. It-tīng tàn tshâ, hio̍h-á kah kut-thâu hōo Mi̍h-kiānn-I tsia̍h, bô i ē sí. Bô tī thôo-kha--ê khut-á lāi-té sî, Mi̍h-kiānn-I pí suann-sai pháinn, Ū-Iánn Pháinn. Tshiunn, póo ia̍h-sī kûn-thâu lóng buē siong-tio̍h Mi̍h-kiānn-I. Beh kā tsóo-tòng iōng tsuí, jiō, tàn thôo-kha ia̍h-sī khe̍h tshiū-ki kā phah. Tsí-ū tshīng lông-phuê ia̍h-sī koh-khah ko-kip--ê Tâng-i ē-tàng khe̍h mi̍h-kiānn tshì Mi̍h-kiānn-I, tshì tsìn-tsîng ài kā Tâng-i U██ kóng.

Tû-hui tsiok té, bô put-tsún tuì Mi̍h-kiānn-I pàng-jiō. -Siá-mn̂g A██

若愛物件-I，童醫O█會當教有狼皮抑是閣較高級的童醫怎用。不准寫怎樣做物件-I，不准講怎做物件-I予無狼皮的人無送你去做有影歹的工課。

Nā ài Mi̍h-kiānn-I, Tâng-i O█ ē-tàng kà ū lông-phê ia̍h-sī koh-khah ko-kip--ê Tâng-i tsuánn iōng. Put-tsún siá tsuánn-iūnn tsò Mi̍h-kiānn-I, put-tsún kóng tsuánn tsò Mi̍h-kiānn-I hōo bô lông-phê--ê lâng bô sàng lí khì tsò Ū-Iánn Pháinn--ê khang-khuè.

物件是啥：物件-I燒，發光的物件，黃色。物件-I無法手搣，毋過共頂懸有物件-I的柴囥入動物頭殼骨時會當共徙位。試了表明物件-I頂懸佮物件-I內底仝款燒，毋過無光。柴、葉仔、皮、膩瓤沐著已經佇遐的物件-I時會有物件-I出現。物件-I嘛會佇物件-III彈著樹仔抑是柴沐著邊仔的物件-IIII的時出現。

Mi̍h-kiānn sī siánn: Mi̍h-kiānn-I sio, huat-kng--ê mi̍h-kiānn, n̂g-sik. Mi̍h-kiānn-I bô-huat tshiú me, m̄-koh kā tíng-kuân ū Mi̍h-kiānn-I--ê tshâ khǹg-li̍p tōng-bu̍t thâu-khak-kut sî ē-tàng kā suá-uī. Tshì liáu piáu-bîng Mi̍h-kiānn-I tíng-kuân kah Mi̍h-kiānn-I lāi-té kāng-khuán sio, m̄-koh bô kng. Tshâ, hio̍h-á, phuê, jī-nn̂g bak--tio̍h í-king tī hia--ê Mi̍h-kiānn-I sî ē ū Mi̍h-kiānn-I tshut-hiān. Mi̍h-kiānn-I mā ē tī Mi̍h-kiānn-III tuānn--tio̍h tshiū-á ia̍h-sī tshâ bak--tio̍h pinn--á--ê Mi̍h-kiānn-IIII--ê sî tshut-hiān.

水、尿、塗、用樹枝搧攏刣死物件-I。毋過，物件-I的人一定共顧好──童醫K███表明物件-I會予代誌-I發生。

Tsuí, jiō, thôo, iōng tshiū-ki siàn lóng thâi--sí Mi̍h-kiānn-I. M̄-koh, Mi̍h-kiānn-I--ê lâng it-tīng kā kòo hó - Tâng-i K███ piáu-bîng Mi̍h-kiānn-I ē hōo Tāi-tsì-I huat-sing.

物件-I對集倚會真有路用──見『挈物件試物件-I』。

Mi̍h-kiānn-I tuì Tsi̍p-uá-huē tsin ū-lōo-īng - kìnn Khe̍h mi̍h-kiānn tshì Mi̍h-kiānn-I.

阮按怎揣著物件：集倚會知影物件-I足久矣。毋過，QHP-I[1]『蹔林苞的』的討掠人O██佮討掠人U██佇叫做『Prometheus磅空』的磅空內底揣著好的看顧物件-I方法。討掠人O██赤手摸著物件-I了後著傷。好的有效的方法用佇按怎看顧像物件-I的物件。討掠人U██佮討掠人O██因為了不起的服務得著半隻長毛象佮兩个查某人。

Gún án-tsuánn tshuē--tio̍h mi̍h-kiānn: Tsi̍p-uá-huē tsai-iánn Mi̍h-kiānn-I tsiok kú--ah. M̄-koh, QHP-I[1] "Tsàm-nâ-pôo--ê"--ê Thó-lia̍h-lâng O██ kah Thó-lia̍h-lâng U██ tī kiò-tsò Prometheus Pōng-khang--ê pōng-khang lāi-té tshuē--tio̍h hó--ê khuànn-kòo Mi̍h-kiānn-I hong-huat. Thó-lia̍h-lâng O██ tshiah-tshiú moo--tio̍h Mi̍h-kiānn-I liáu-āu tio̍h-siong. Hó--ê ū-hāu--ê hong-huat iōng tī án-tsuánn khuànn-kòo tshiūnn Mi̍h-kiānn-I--ê mi̍h-kiānn. Thó-lia̍h-lâng U██ kah Thó-lia̍h-lâng O██ in-uī liáu-put-khí--ê ho̍k-bū tit--tio̍h puànn tsiah tn̂g-moo-tshiūnn kah nn̄g ê tsa-bóo-lâng.

其他事-I

Kî-thann sū-I

挈物件試物件 - I
KHE̍H MI̍H-KIĀNN TSHÌ MI̍H-KIĀNN-I

試：I
啥人試：赦門A██
試物件：挈槍揬物件-I。
發生啥：物件-I湠到槍頂懸。
TSHÌ: I
SIÁNN-LÂNG TSHÌ: Sià-mn̂g A██
TSHÌ MI̍H-KIĀNN: Khe̍h tshiunn tu̍h Mi̍h-kiānn-I.
HUAT-SING SIÁNN: Mi̍h-kiānn-I thuànn kàu tshiunn tíng-kuân.

試：II
啥人試：赦門A██
試物件：對槍放尿，挈槍揬物件-I。
發生啥：槍焦，鼻起來像尿。物件-I無湠到槍頂懸。
TSHÌ: II
SIÁNN-LÂNG TSHÌ: Sià-mn̂g A██
TSHÌ MI̍H-KIĀNN: Tuì tshiunn pàng-jiō, khe̍h tshiunn tu̍h Mi̍h-kiānn-I.
HUAT-SING SIÁNN: Tshiunn ta, phīnn--khí-lâi tshiūnn jiō. Mi̍h-kiānn-I bô thuànn kàu tshiunn tíng-kuân.

試：III
啥人試：赦門A██
試物件：對物件-I放尿
發生啥：物件-I湠到鳥仔頂懸。赦門A██健康進前童醫U██主管試物件。
TSHÌ: III
SIÁNN-LÂNG TSHÌ: Sià-mn̂g A██
TSHÌ MI̍H-KIĀNN: Tuì Mi̍h-kiānn-I pàng-jiō
HUAT-SING SIÁNN: Mi̍h-kiānn-I thuànn kàu tsiáu-á tíng-kuân. Sià-mn̂g A██ kiān-khong tsìn-tsîng Tâng-i U██ tsú-kuán tshì mi̍h-kiānn.

試：IIII
啥人試：童醫U██
試物件：囥肉入去物件-I
發生啥：物件-I無湠到肉頂懸。
TSHÌ: IIII
SIÁNN-LÂNG TSHÌ: Tâng-i U██
TSHÌ MI̍H-KIĀNN: Khǹg bah li̍p--khì Mi̍h-kiānn-I
HUAT-SING SIÁNN: Mi̍h-kiānn-I bô thuànn kàu bah tíng-kuân.

試：IIIII
啥人試：童醫U██
試物件：尿佇槍頂懸。用槍共肉挈出來。
發生啥：槍焦。槍鼻起來像尿。肉好食，毋過鼻起來像尿。
TSHÌ: IIIII
SIÁNN-LÂNG TSHÌ: Tâng-i U██
TSHÌ MI̍H-KIĀNN: Jiō tī tshiunn tíng-kuân. Iōng tshiunn kā bah khe̍h--tshut-lâi.
HUAT-SING SIÁNN: Tshiunn ta. Tshiunn phīnn--khí-lâi tshiūnn jiō. Bah hó tsia̍h, m̄-koh phīnn--khí-lâi tshiūnn jiō.

試：IIIII I
啥人試：討掠人O██
試物件：囥水到槍頂懸。囥肉到槍頂懸。囥槍入去物件-I。
發生啥：槍焦。槍無鼻起來像尿。肉誠好食。討掠人O██這馬童醫O██
TSHÌ: IIIII I
SIÁNN-LÂNG TSHÌ: Thó-lia̍h-lâng O██
TSHÌ MI̍H-KIĀNN: Khǹg tsuí kàu tshiunn tíng-kuân. Khǹg bah kàu tshiunn tíng-kuân. Khǹg tshiunn--li̍p-khì Mi̍h-kiānn-I.
HUAT-SING SIÁNN: Tshiunn ta. Tshiunn bô phīnn--khí-lâi tshiūnn jiō. Bah tsiânn hó tsia̍h. Thó-lia̍h-lâng O██ tsit-má Tâng-i O██

試：IIIII II
啥人試：童醫U██
試物件：擲漢麻入去物件-I
發生啥：[資料鍤掉]
TSHÌ: IIIII II
SIÁNN-LÂNG TSHÌ: Tâng-i U██
TSHÌ MI̍H-KIĀNN: Tàn hàn-muâ--li̍p-khì Mi̍h-kiānn-I
HUAT-SING SIÁNN: [TSU-LIĀU TSHIAH TIĀU]

代誌-I

Tāi-tsì-I

佇記會起來的██████████████████月圓的II工磅空-II透早無擂鼓。派QHP-I『蹔林苞的』去看發生啥。發現磅空-II內底溫暖，有集倚會的人死而且[資料鍤掉]，佇磅空的壁嘛有。死人身軀無空喙。
Tī kì ē--khí-lâi--ê ██████████████████ gue̍h-înn--ê II kang Pōng-khang-II thàu-tsá bô luî kóo. Phài QHP-I "Tsàm-nâ-pôo--ê" khì khuànn huat-sing siánn. Huat-hiān Pōng-khang-II lāi-té un-luán, ū Tsi̍p-uá-huē--ê lâng sí jî-tshiánn [TSU-LIĀU TSHIAH TIĀU], tī pōng-khang--ê piah tíng-kuân mā ū. Sí-lâng sin-khu bô khang-tshuì.

其他事-II：

Kî-thann sū-II:

佇記會起來的████████████████████████████月圓IIIII I工，童醫O█用[資料鍤掉]對無影無跡內底做出物件-I。物件-I這馬愛講是了解的物件。
S-IIIII議會
Tī kì ē--khí-lâi--ê ████████████████████████████ gue̍h-înn IIIII I kang, Tâng-i O█ iōng [TSU-LIĀU TSHIAH TIĀU] tuì bô-iánn-bô-tsiah lāi-té tsiânn kín tsò-tshut Mi̍h-kiānn-I. Mi̍h-kiānn-I tsit-má ài kóng sī Liáu-kái--ê Mi̍h-kiānn.
S-IIIII Gī-huē

尾註

Bué-tsù

[1]譯者註：檢查過隨後的CKG文件了後，確定QHP代表「快速規陣討掠人」(Quick Hunter Pack)

[1] I̍k-tsiá tsù: Kiám-tsa kuè suî-āu--ê CKG bûn-kiānn liáu-āu, khak-tīng QHP tāi-piáu 'Khuài-sok Kui-tīn Thó-lia̍h-lâng'(Quick Hunter Pack)

喜歡 1 收藏引用留言推上首頁檢舉

引用網址：https://home.gamer.com.tw/TrackBack.php?sn=4249587
Some rights reserved. 姓名標示-非商業性 2.5 台灣

相關創作

同標籤作品搜尋：翻譯|SCP|SCP基金會