我真正足向望有閣較濟自細漢著講台語而且是有充足兮母語環境兮儂去學台語欲按怎寫，覅會曉寫台語兮儂足濟攏是我即種無捷咧講兮抑是平常時罕得有機會通講兮。毋過真可惜兮著是彼寡台語真輾轉兮通常是彼種上毋願意學兮。傷濟儂按細漢著予儂灌輸「台語無法度寫」兮觀念，欲改變嘛改無法。予儂閣較慼心兮是，大部份兮儂攏認為會曉寫華文著好矣，是按怎愛拍損時間學即種無路用兮物件。我定定聽著即款聲音，怹著是無心，閣會使講啥？上討厭兮是，無想欲學著準拄煞矣，閣共儂漩兮彼種。
有時陣我會思考講像以思麗汝（Israel）儂復興希舞汝語（Hebrew）即款代誌敢有法度仝款發生佇台灣，毋過若斟酌想，著知影恐驚仔是無可能。是按怎咧？儂以思麗汝儂是有強大兮民族意識佇怹背後捒怹向前行，怹相信講家己兮民族著愛有一个民族語言，彼毋是干焦靠一个政府著做會到兮。愛知影希舞汝語佇將近兩千冬進前著滅絕矣，彼寡母語本底毋是希舞汝語、蹛佇四界兮猶太儂，是抱著全世界猶太民族著應該講相仝語言兮決心，共厝徙去以思麗汝，佇遐生囝，共怹囝兒序細用怹「完全」講袂慣勢兮語言講話，雖然怹本身毋是母語使用者，猶是有才調沓沓仔培養出愈來愈濟兮現代希舞汝語母語使用者。
斡過頭來看台灣，台灣儂敢普遍有堅定兮台灣民族意識？誠明顯無，閣有袂少儂有足堅定兮中國儂意識。台灣儂對家己講兮語言敢有重視？嘛看會出無。袂少儂雖然會曉講母語，煞對家己有才調講母語感覺真見笑，甚至閣隱瞞家己會曉講即件代誌，看講母語兮儂袂起，共儂當做笑詼咧創治。答案足明顯矣，事實著是有心欲保護、保存母語兮儂傷少，覅妄想講有像以思麗汝相像強力兮政府機器支持著通好推廣母語，儂若無心，做汝舞甲規身軀汗，猶是無法度實現汝家己兮願景。
創作內容
[想法] 語言兮復興
讀書心得、雜感 (47)