佇即个華語通行兮時代,我嘛是有看著儂對「就算佇庄跤,台語兮使用率嘛是愈來愈低兮現象」感覺真煩惱,抑毋過,伊兮想法,或者是講對策,閣停留佇愛加佮囡仔講即个語言爾爾,而且伊嘛認為台語無需要文字。老實講,即款想法若是繼續落去,著註定台語會行向絕跡。
按呢做,干焦會共台語兮使用範圍限制佇厝內底,無法度閣創造新詞,一个語言若是失去綴佇時代身軀邊兮能力,就會親像死水,慢慢臭酸去,上尾仔干焦有予儂放拺兮命運。不管如何,若是身軀邊抵好有看著對台語保存有熱情兮儂,說服伊袂使閣有「台語無字」兮觀念是一件至關重要兮代誌。
一般儂對台語本身有偌無知咧?真濟庄跤囡仔兮母語是台語,怹通常攏是佇學校才開始學所謂兮國語,也著是華語,怹透過國語課,學著真濟對怹來講是第二語言兮華語兮智識,怹可能會知影華語是一個聲調語言,而且有四个聲調,了解某一个漢字兮華語讀音是啥。其中一寡儂可能閣會因為對國文兮興趣,大學決定揀中文系。
毋過,上予儂感覺遺憾兮代誌來矣,若是咱來問即寡自細漢著咧講台語兮儂一寡關於台語兮智識,怹可能啥物攏毋知。愛等咱予怹答案了後,怹才知影,原來台語嘛是一種聲調語言,而且聲調兮數量閣比國語濟,所有兮漢字嘛像華語仝款,全部攏會使用台語來念。
怹毋捌即寡物件雖然足使儂遺憾,當然這嘛毋是怹兮毋著,因為學校無教嘛。才會造成即種真好笑兮現象:對家己兮母語,一點仔智識也無,顛倒對一个大漢以後才學兮語言較了解。
講到遮,有一寡對台語傳承真熱情兮儂可能會感覺真憤慨,抑毋過予儂閣較心寒兮是:有一寡共台語當做母語兮儂都感覺無必要學即種「粗俗兮語言」,怹感覺「學國語著好矣啊,為啥物欲浪費時間學台語」。這是一種對家己語言文化無自信兮表現,落尾仔著會親像愛爾蘭儂仝款,毋但失去家己兮母語文化,閣干焦會曉講一喙予儂笑兮「國語」。