無條件基本收入 kah 密箍是啥？
這咱愛先 ùi 密箍 ê 起頭「BIT箍（Bitcoin）」講起，tī 舊年一箍 ê 「BIT箍」對美元 ê 匯率尚koân強欲 kah 兩萬美元，為啥物這款 ê 貨幣有遐呢koân ê 幣值 --leh？伊佮大部份由政府財政體系制定 ê 貨幣無仝，這，是 hō͘ 做「密箍」ê 暗號貨幣（Crypto Currency）。
暗號，這是啥物意思 --neh？閣為啥物欲設計這款 ê 貨幣？
密箍 ê 運作，是建立 tī hō͘ 做區鍊（Block Chain） ê 暗號資訊技術，透過這款規則 kah 技術確保資料真惡 hō͘ 操作（註0），嘛免 koh 經手任何人 ê 管理 kah 控制 tio̍h 會當家己運作。密箍通常是 hō͘ 設計做有一定 ê 發行量，伊主要 ê 生產方式是愛 ùi 使用者 ê 計算機（運算家私）來去解除電子暗號（這是協助區鍊記錄資料 ê 自願者競賽），「算--出」新 ê 貨幣（協助運作 ê 獎賞），這是怹這寡「挖礦人」 tì 講 --ê「 挖 tio̍h 礦」，有一寡密箍 ê 設計是當 hō͘ 「算」出 --ê 貨幣愈濟，伊 tio̍h 會愈惡 koh hō͘ 「算」出來（獎賞減少），使用者 ê 交換是透過 tī 仝款 ê 技術基礎，使用 hō͘ 做「電子荷包」 --ê 軟體去進行。
BIT箍 ê 創始人 tī 程式碼 ê 第一pha tio̍h 有寫，英國 koh 欲QE --ah，QE是一款國家金融機構操作借貸利率， hō͘ 國內金融機構提koân伊借貸能力致使增加貨幣發行量 ê 方法，這是 tì 擴大發行「債務貨幣」，一款永遠無法度還清負債 --ê 貨幣發行方式。
「永遠無法度還 hō͘ 了？」
這 kám 毋是有一 --ê 借，tio̍h 會有一 --ê 還，總數攏袂改變，哪會當講還袂了？不而kò，現代貨幣制度 --ê 事實 sòa 離這真遠，咱叫是 kā 錢囥入--去銀行，怹通 hō͘ 咱利息（若準怹經營順事）閣會當保護咱 ê 血汗錢，毋閣，事實上銀行是干若保留咱一部份 ê 存款，偆 ê 部份伊攏會使閣 kā 借出--去，若準伊 ê 比率是10%，銀行就有法度用咱 ê 一百箍借貸出欲一千箍，趁遐借貸 --ê 利息，伊嘛按呢 teh 「創造貨幣」，這干焦是 kā 簿仔／電腦頂 --ê 數字改改 --leh niâ，按呢 kám 會當運作？當然，只要人勿仝時 kā 錢攏領出--來著會使，彼 ê 狀況若發生是 hō͘ 做「銀行走（Bank run）」抑是擠兌、擠提。這款制度創造出 --ê 「新錢」是愛還 hō͘ 銀行 --ê，毋閣伊無創造出利息 --ê 錢，落尾干焦會當 koh 去 kā 銀行借來還（抑是 ùi 別人遐「提」），這， hō͘ 做「部份準備金制度（Fractional Reserve）」，伊 hō͘ 世界大部份 ê 國家金融機構所使用，今有97% ê 貨幣攏是透過借貸來產生。
這致使「債務 --ê 指數成長」，全世界 --ê 國家債務早 tio̍h 超過生產總額 ê 3倍 koh khah 濟 --lah（註1），當然，伊嘛確保使用伊制度 --ê 人一定會產生「輸家」，創造出這款「人為（債務）乏乏」 --ê 競爭環境，tī 這箍遊戲內建 --ê 向力會 hō͘ 參與 ê 人想欲趁 koh khah 大 --ê 利純， hō͘ 家己會當繼續耍 --loeh 去，抑是勉強活 --leh。頭前講 --ê 尚bái tio̍h 親像以「破壞生態環境（污染 kah 計劃性報廢 ia̍h-sī kā 物件銷毀來控制價數）」、「無顧別人死活（社會正義）」等等無永續 --ê 方式來「趁錢」，剾洗 --ê 是，這是 tī 現此時 ê 地球資源抑是人類生產能力早 tio̍h 通滿足百偌憶人類物食 kap 生活 ê 時陣（註2）所發生。
總總頂面講 --ê 狀況，干若會 hō͘ 咱 --ê「財產」價值降低，嘛 hō͘ 囝孫艱苦，這是 hō͘ 體制 ê 搶剝 。
Koh 有 --lah，現代貨幣今攏是建立 tī 「信用」之上，一 ê 會負責 ê 承諾。美元往過 hō͘ 做「美金」是因為伊通換做一定數量 ê 金仔，不而kò這套體系已經 hō͘ 取消 --lah，毋閣 --ah，這款無任何擔保做基礎 --ê 貨幣嘛袂 án-nà，伊 ê 價值是源自使用者對伊 ê 信心，使用者 kā 家己 ê 產品用伊去做交易 tio̍h 是 tì 為這款貨幣做擔保。
BIT箍 ê 創辦人伊透過發行這款 ê 貨幣，想欲改變今貨幣發行權 hō͘ 少數人歸碗捧--去 kah 操作 --ê 現狀。不而kò，目今這 sòa 變做另外一款炒作 kah 投資 --ê 家私，閣 hō͘ 一寡非法犯罪有法度透過這款方式來暗khàng怹 ê 資金，好進行非法交易。
今嘛有濟濟款 ê 密箍 --ah，tī 原底 ê 狀況我是看怹無目地，對社會無啥正面 ê 幫贊，一直到這暫仔，我有發見第一款由非營利組織（NPO）發行，以「無條件基本收入」做分配 ê 密箍才 hō͘ 我改變想法，怹講怹是「咱人 ê 貨幣（People’s currency），Manna」，咱先 kā 看覓 --leh，啥物是「無條件基本收入（Universal Basic Income）」？
無條件基本收入簡單講 tio̍h 是逐人毋管散赤好額攏會 tī 一定 ê 時間內底分著一筆按照僬齊 ê 物價做標準，通維持基本生活開銷 ê 收入
有這款 ê 基本收入了後，人就有 koh khah 濟 ê 選擇來去揀頭路做，袂因為無做 tio̍h 袂活，sòa 委屈家己做毋願 ê 代誌，抑是去做對社會有幫贊毋閣普遍是歹趁食 ê 代誌，這 hō͘ 人有法度通發揮怹家己 ê 潛能，嘛是保障做為人 ê 基本生存權。
「這．．．聽--起來是真好 --lah，毋閣這款代誌哪有可能？Án-ne 逐人攏 boâi 做穡 tì 遐貧惰 tio̍h 好，而且咱 kám 有遐濟錢通分？」
汝講 --ê 無毋著，阮遮是干焦用講 --ê niâ，一定愛有實驗才會使，根據過去 tī 印度、加拿大抑是一寡非洲國家 ê 實驗資料（註3），攏證明人毋是食飽 tio̍h 攏無愛做穡，怹遐 ê 人反倒教育 ê 水準變 khah koân，破病 ê 人偆 khah 少，落尾連犯罪 ê 人嘛變 khah 少 --ah。若準人食飽 tio̍h 攏無愛做代誌，kám 代表好額人趁到額 hō͘ 怹tau生活了後，tio̍h 攏無愛做 --ah？
這款無條件基本收入 ê 概念 tī 這百偌年來 tio̍h hō͘ 一寡立場無仝 ê 經濟學家抑是思想家提--出來討論過，怹對欲 án-ná 消除散赤 ê 尚好方式有一 ê 共識，tio̍h 是直接 kā 錢提 hō͘ 怹去用。
這毋若是欲解決散赤 ê 問題 niâ，嘛是面對日後生產技術 kah 自動化 ê koh khah 提升可能發生 ê 「科技性失業」 kah 愈來愈擴大 ê 赤額差距（註4）伊可能產生 ê 問題。Tī 這款狀況之下，消除散赤 ê 價值咱頂面有講 --ah，毋閣伊 ê 價數是偌濟，欲按若做才有法度？
這部份 ê 討論 iā 有幾ā種，有 ê 方案是改變稅收結構，統合做消費稅，抑是增加稅收，嘛有按減少別項預算 ê 方面來行，tī 美國是干若 kā 怹四分之一 ê 國防預算減少 tio̍h 會當成做無條件基本收入 ê 預算，抑是取消社會福利政策 ê 各種補助等等。
當然，咱嘛愛知影，今世界上抑未有任何 ê 國家、政府抑是組織真正有達成大規模（咱先 kā 設定做百萬人） ê 去實行無條件基本收入。瑞士有相關倡議組織提案，tī 2016年 ê 時陣 bat 舉辦過公投，落尾 sòa 無通過，荷蘭今是有規劃 --ê teh 進行相關社會實驗，咱台(澎)島嘛仝款，tī 這幾冬都有人 tì 倡議，這暫仔閣 khah 有積極 tì 舉辦各種活動抑是研討會，擴大對這款議題 ê 討論。
Án-ne，無條件基本收入是欲 án-chóaⁿ 用「Manna」來實現？怹為啥物愛做這？
為啥物愛做這（Why Manna）？－Manna說論冊（White paper）第四頁
「佇看見無平等連紲 teh 成長 chah 來 ê 苦難了後，阮知影今 ê 體制系統本身是無公正 kah 無永續 --ê。阮嘛知影阮有道德 ê 義務 kah 知識愛去行動，所以講阮才會 saⁿ-keng 做伙，創造出一套咱今尚需要， koh khah 好 ê 選擇：一款有內建意識 tì 促進 koh khah 公正 kah 永續 ê 全球經濟系統。」
營運Manna ê 組織「咱人 ê 貨幣基金會（The People’s Currency Foundation）」是美國政府認證 ê 非營利組織（NPO），怹毋若透過無條件基本收入去保障生存權，解決散赤 kah 財產分配失恆 ê 問題，嘛欲解決債務貨幣 ê 無永續問題，用這款技術提koân交易 ê 效率 kap 促進有效 ê 利他主義（註5），閣欲去建立全球有社會責任意識 ê 企業、非營利組織 kah 怹支持者 ê ân密網絡，落尾怹是向望這會當成做一款以各種投資做擔保 ê 另類全球儲備貨幣（親像美元 hō͘ 真濟國家當做對外通行 ê 貨幣）， hō͘ 全球性 ê 非政府組織（NGO）來去做營運。
Manna 現此時 ê 價值擔保主要是源自市場 ê 供需 kap 怹基金會 ê 捐款（捐款 hō͘ 怹是通減稅），怹設定到2027為止，全部 ê 發行量是會當有24億9800萬箍單位 ê Manna密箍，基礎設計是用無條件基本收入去逐年 kā 現行貨幣循環增加3.5% ê 供給，逐禮拜做一 kái 無條件基本收入 ê 分配，tī 今 ê 機制，人是愛經過審查確定才會當有UBI分配 ê 授權，毋閣口座是通辦幾也 -- ê，資料嘛有可能假造，未來是有欲增加審查 ê 精確性，親像 kah 現此時 ê 國家、政府合作辦理這項工課。
這供給率嘛 kah 美元歷史僬勻 -- ê 仝款，這款世界尚成功 ê 貨幣落尾 sòa kā 怹 ê 供給率每20冬 tio̍h 大概增加一倍。怹講，這 ê 供給率 tī 怹進前 hō͘ 做Grant Coin時 hō͘ 證實是穩定-- ê，袂 hō͘ 錢薄-- 去，交換價值甚至閣變 khah koân（ùi 2015年創立Grant coin開始，已經有價值25萬美元 ê Grant coin hō͘ 當做無條件基本收入分配出-- 去；毋閣 ùi Manna開放口座 ê 交易系統了後，伊 ê 交換價值 sòa 落 kah 欲進前 --ê 5倍 khah 低）；怹嘛有 hō͘ 認為家己無需要基本收入 ê 人通 kā 怹 ê 基本收入捐 hō͘ 特定群體抑是別 ê 有需要 ê 人 ê 選擇，抑是 kah 孤兒院合作，kā 怹遐 ê 囡仔開一 -- ê 口座，這是 tī 伊細漢 ê 時陣干若會當 kā 錢轉入-- 去，等伊大漢 tio̍h 會當用 ê 計劃。
今（2018.07.03） Ｍanna 用美元交換 --ê 價數是0.0034元，當然，伊是抑未成做一 -- ê 隱定 --ê 經濟體系，今年（2018.01）是抵 ùi Grant Coin轉做Manna（改名換招牌），怹基金會嘛有 teh 計劃伊 ê 發展。無條件基本收入 ê 分配網站（Manna Base）有 tì 進行無條件基本收入 ê 分配，嘛有開放轉出 kah 轉入 ê 交易功能。
若準欲使用Manna做為通 hō͘ 接受 ê 貨幣，我目今想 tio̍h 尚有可能 ê 方式是一陣了解這寡根源問題、認同伊(Manna)理念嘛有供應關係 ê 產業，先共買一定數量 ê Manna去做分配，才有法度做交換衡量 kah 使用，這嘛提koân Manna ê 需求，提升這款貨幣 ê 信用（保障）程度。
總是，尚尾咱愛知影一件代誌，毋管是用金仔抑是這套信用貨幣攏總無法度表達實際 ê 資源
親像1929美國發生「Great depression（大蕭條）」 ê 時陣，人大量失業，破產無頭路 tì 遐凍iau，甚至自殺，毋閣，事實上所有 ê 生產資源猶閣 tī--leh，這款會當避免 ê 體制問題，造成 ê 損害 koh khah 贏自然天災。所以講今嘛有濟濟 tì 促進實際資源整合 kah 利用 ê 行動，親像「家私圖書館（Tool Library）」，是一 ê 各種家私做主體 ê 圖書館，伊 ê 理念是「咱毋免去所有真濟物件，咱干若 tī 需要 ê 時陣去 kā the̍h--tio̍h (使用) to̍h 好」 （註6），抑是想欲解決偆食問題 ê 偆食餐廳（Recycled Food），怹會去 kah 擔商合作，kā 原底無好看抑是賣袂出--去，koh 通食 ê 物食、食材收倒轉--來， kā 分出去抑是成做餐點 hō͘ 逐家（註7）……等等親像這款通提升資源使用效率 ê 行動。
就 án-ne，咱是有各種可能 ê 選擇，這 ê 時代一定愛轉變做一套以人道關懷做基礎 ê 永續體制，囝孫才有未來。
Manna（Tâi-oân）－Google + 討論群組，歡迎逐家來做伙參與：https://goo.gl/ptHokB
創作內容
Manna，第一款以無條件基本收入做基礎 ê 密箍(Crypto Currency)
黑暗編年史 (0)
