【話頭】
今仔日(10/26)thâu-pái欣賞《愛在雨過天晴時》ê真人電影版，以前捌看過anime版，ED是Aimer ê Ref:rain（應該袂少人捌聽過），無看過伊ê bàng-gah。兩年前看著電影ê見本，我tō足期待ê，而且女主角橘kap店長近藤ê演員——小松菜奈kap大泉洋——lóng揀liáu袂䆀，袂輸是tùi anime走出來ê仝款合合合，尤其是店長ê演員——大泉洋，是我誠佮意ê藝人，tī 2016大河劇《真田丸》頭一改熟似伊，看伊tī綜藝節目ê表現，感覺這个人put-chí-á 趣味koh非常喜感、厚話w，我嘛有買伊ê書《從落難考生到影帝：大泉洋的十六年青春饒舌物語》，這本書逐家會使bóng參考看覓。毋過我後來siuⁿ無閒soah袂記得看這齣電影，Chăng web surfing ê 時陣才想起來XD。
電影見本，敢若是今年2020才tī台灣放影ê款
歹勢neh，我這个人嘛較厚話，話頭講較長哈哈。
Soah落去會暴雷，若無想欲hông暴雷ê，請閃較邊仔ê喔！雷著無負責！（兩津勘吉氣口
【劇情】
劇情講著一位tī陸上部誠夯走相逐、又閣是新記錄保持人ê女高中生——橘晶，tī一改練習中間跤後蹬著傷，經過手術、復健了後，伊煩惱家己可能一世人lóng bē-ēng-eh koh親像以前仝款走遐爾仔緊矣。雖然無退出社團，但是伊真罕得去參加社團活動，soah定定走去一間家庭餐廳part-time。為何伊會選擇彼間無倚in兜ê所在做part-time咧？因為彼間餐廳ê店長近藤正己是橘所意愛ê人，若按呢，是按怎一位十七歲ê青春少女會去saⁿh著四十五歲ê離婚中年o͘-jí-sáng？原因tō愛tùi復健期間講起，有一改橘tī餐廳覕雨，伊戇戇看向窗外ê雨，近藤行過送予橘一杯咖啡koh表演奇術予伊看，離開進前講了一句鼓勵橘ê話，tō按呢生橘去saⁿh著近藤矣。近藤嘛有伊家己必須愛解決ê問題、一个心內ê阻礙，伊ê願望是做小說家，但是按怎寫嘛袂出名，伊開始逃避，猶毋過伊猶原無法度放棄伊ê興趣。橘向近藤告白了後，這兩个人是愈行愈倚，近藤誠躊躇，一直無回應橘ê情意，因為年紀差siuⁿ濟矣。尾仔兩人互相扶持、互相理解，tùi家己跋倒ê所在重新開始。
【感想】
兩人互動是誠趣味，看橘因為無siáⁿ ē-hiáu表達家己ê khi-mó͘-chih 加上外表siuⁿ クール，予近藤誤會、緊張煩惱w，看近藤予其他員工欺負ww。誠歡喜兩人沓沓仔恢復信心，面對挑戰、追求願夢，這是in兩人互相療癒ê過程，tō親像伊另外一个譯名戀如雨止，我感覺這毋是咧講兩人戀情ê結束，顛倒是戀情ê開始，雨過了後放捒過去ê失志，迎向全新ê未來，毋才會是愛在雨過天晴時。Tng當in攬做伙彼段，我心肝頭咧喝：「Súi--lah!!!近藤tō是按呢！小等一下，你ná-ē koh hê落去矣(○´･д･)ﾉ人橘tō對你有意思你是咧？是毋是查埔囝啊～(#`O′)」毋過冷靜思考，近藤按呢做才是正港ê男子漢！讚！「始於情，止於禮」，近藤我佩服你！
近藤ê顧慮會當理解，年歲差遐濟，家己koh是做啥物代誌lóng搵豆油ê失敗中年，伊毋願辜負橘、毋敢有進一步ê發展；橘tō無仝矣，自從告白了後，一寡積極ê行動嘛tè咧來，可能因為少年，伊無顧慮遐濟，會當提出勇氣、勇敢表達自己ê心意，伊嘛講過：「這和年紀、別人ê看法無底代，佮意就是佮意矣！」「佮意一个人敢需要理由？」，橘是一位敢愛ê查某囡仔。近藤嘛因為橘，漸漸仔拍開內心，再次體驗著一改學生時代談戀愛ê酸甜苦澀，若tńg-khì彼陣ê少年近藤，嘛tùi橘遐得著勇氣，想欲重新振作起來。In ê戀愛毋是肉體關係，是在tī心，雖罔近藤lóng無講破，敢若講和橘是朋友，毋過兩人ê曖昧已經說明了一切矣(●ˇ∀ˇ●)，我想橘嘛一定會當了解近藤是「愛在心裡口難開」(´ｰ∀ｰ`)。
路尾in兩人到底有做伙ah無，無論bàng-gah、anime、電影lóng無交代，但是tī我ê心內in已經做伙矣。這是一齣真值得逐家沓沓仔欣賞ê作品，anime、電影lóng誠推薦，anime關於近藤內心ê口白有較幼路、較詳細，電影ê這兩位演員若是換來翕電視劇ê版本一定會閣較好看，畢竟電影ê時間有限，無法度將所有ê物件攏總囥入去，若有翕做電視劇毋知有偌好，未來我嘛會揣時間來補伊ê bàng-gah。上佮意這款純愛êラブストーリー矣，看了心情ke偌爾仔好leh，規个人lóng khi-mó͘-chih spring giang矣。(❁´ω`❁)。話講到遮我又閣想欲tńg-khì看一改anime kap電影囉。o((>ω< ))o
P.S. Bàng-gah、anime內底ê近藤看起來足sêng《機動警察》ê後藤w，Lóng是非常有魅力ê男(おとこ)！
